Bjarni Ben lofaði líka heilbrigðismálum í forgang 2013.

Núna þegar formaður Sjálfstæðisflokksins lofar heilbrigðismálunum í forgagn "á næsta kjörtímabili" er gagnlegt að vega og meta hversu líklegt er að hann standi við þetta kosningaloforð, sem fokkurinn hans gaf líka fyrir síðustu kosningar.

Fyrir síðustu kosningar samþykkti landsfundur Sjálfstæðisflokksins "að leggja skattfé fyrst í þau verkefni sem eru brýn og áríðandi. Örugg heilbrigðisþjónusta, góð menntun og trygg löggæsla skal vera í forgrunni."

Fyrsta flokks heilbrigðiskerfi er í forgangi hjá 90% lands manna í könnunum sem Gallup hefur gert fyrir þingflokk Pírata síðustu 3 ár. Stjórnarflokkarnir hafa hins vegar sýnt það aftur og aftur að þeir forgangsraða öðru fyrst.

• Lægri veiðigjöld fyrir sjávarútvegsfyrirtækin hefur meiri forgang. 
• Það hafði afnám auðlegðarskattsins líka. 
• Lækkun skatta á álfyrirtækin var forgangsverkfni fjármálaráðherra 1. maí á síðasta ári.
• Svo vildi hann lækka skatta í stað þess að forgangsraða því svigrúmi sem lægra vaxtabyrði ríkissjóðs skapar til að halda í fyrsta flokks heilbrigðiskerfi. 

Það er kýr skýrt að örugg heilbrigðisþjónusta er ekki í forgrunni hjá þessari ríkisstjórn eins og lofað var fyrir síðustu kosningar.

Heilbrigðismálin í forgang

Davíð búinn. Grín með stríðsfórnarlömb er útslagið.

Davíð Oddsson setti Ísland á lista hinna viljugu bandamanna í Íraksstríðinu.
Þjóðirnar á listanum voru samábyrgar fyrir stríðinu samkvæmt George Bush.
Stríðið var ólöglegt samkvæmt Kofi Annan aðalritara Sameinuðu Þjóðanna.

Davíð sem sækist eftir því að verða forseti Íslands gerir ábyrgð sína og tölu látinu í stríðinu að hlátursefni á kosningafundi í gær; aðeins þrjá daga í kosningarnar.

Íslendingar munu ekki velja slíkan mann sem sameiningartákn þjóðarinnar og andlit Íslands á alþjóðavettvangi. Þetta er búið hjá Davíð.

Aðalritari Sameinuðu Þjóðanna: "Íraksstríðið ólöglegt."

Kofi Annan sem Aðalritari Sameinuðu Þjóðanna sagði innrásina í Írak: "ekki samræmast sáttmála Sameinuðu Þjóðanna, frá okkar sjónarhorni, og frá sjónarhorni sáttmálans þá var hún ólögleg."

Sáttmáli Sameinuðu Þjóðanna sem Ísland hefur verið aðili að frá 1946 heimilar ekki árás á annað fullvalda ríki nema það ríki hafi sjálf þegar ráðist á annað ríki. Í því ljósi heimiluðu Sameinuðu Þjóðirnar árás á Írak í persaflóastríðinu 1991 eftir að Írak hafði ráðist á Kúweit. Írak hafði ekki ráðist á annað ríki þegar bandalag hinna viljugu þjóða, með Ísland samábyrgt, hóf innrás í Írak 20. mars 2003

Rúmlega 76% landsmanna voru andvíg stuðningi Íslands við innrásina.

Sanngirni, sómakennd og Davíð Oddsson

Davíð Oddsson forsetaframbjóðandi segir að: "við verðum að vera menn til þess að standa við það sem við höfum sagt." Morgunblaðið hefur eftir Davíð daginn áður en Íraksstríðið hefst að hann hafi þá þegar sett Ísland á lista hinna viljugu þjóða.

Í viðtali á Hringbraut sem forsetaframbjóðandi 20. maí síðastliðinn stendur Davíð ekki við það sem hann hafði sagt eftir að hann gerði Ísland samábyrgt í stríði. Hann segist þar hafa gert það "eftir að stríðið var hafið." Níu dögum síðar í viðtali á Eyjunni segir Davíð við Guðna Th forsetaframbjóðenda: "Guðni, elskulegur Guðni, ef þú ætlar að bjóða þig fram til forseta þá máttu ekki hlaupa frá öllu sem þú hefur sagt, þú bara mátt það ekki. Ég geri það ekki, og þú mátt það ekki, það er ekki sanngjarnt."

Ísland þurfti ekki að vera samábyrgt í þessu stríði. Davíð Oddsson ákvað að setja okkur á listann. Íslendingar eru stoltir af því að vera friðsælt og friðelskandi fólk. Síðar í mánuðinum sjáum við hvort að landsmenn vilja sjá sem sameiningartákn þjóðarinnar og andlit Íslands á alþjóðavettvangi þann mann sem gerði Ísland samábyrgt í stríði sem kostaði hundruð þúsunda lífið.

 

Bush sagði Davíð gera Ísland samábyrgt í Írakstríðinu

Íslendingar eru herlaust og friðelskandi fólk sem Davíð Oddsson setti á lista bandalags hinn viljugu þjóða í árásarstríði á Írak.

Kvöldið fyrir innrás bandamanna í Írak ávarpaði Bush þjóð sína. Þar lýsir hann að loftárásir væru hafnar og að "Hver einasta þjóð í þessu bandalagi hefur valið að axla ábygðina og deila heiðrinum við að standa vörð um sameiginlegar varnir okkar."

Noregur, Frakkland, Þýskaland og flest ríki í vestur Evrópu skrifuðu sig ekki á listann. Costa Rica lét fjarlægja sig af listanum eftir að stjórnlagadómstóll úrskurðaði að vera landsins á listanum bryti í bága við meginreglur landsins um friðsemi. Þátttaka í stríðinu fylgdi ekki því að vera NATO meðlimur og Sameinuðu Þjóðirnar studdu stríðið ekki.

Ísland þurfti ekki að vera samábyrgt í þessu stríði. Davíð Oddsson ákvað að setja okkur á listann, sem var birtur 18. mars 2003, og það áður en málið var rætt á ráðherrafundi og í utanríkismálanefnd Alþingis 21. mars 2003 eins og lög og stjórnarskrá kveða á um.

17 grein Stjórnarskrár Íslands segir: "Ráðherrafundi skal halda um nýmæli í lögum og um mikilvæg stjórnarmálefni." Svo annað hvort er stjórnarskráin það gölluð að tveir ráðherrar geta gert Ísland samábyrgt í stríði með því að segja þá ákvörðun ekki vera "mikilvæg stjórnarmálefni" eða að Davíð braut stjórnarskránna.

Íslendingar eru stoltir af því að vera friðsælt og friðelskandi fólk. Síðar í mánuðinum sjáum við hvort að landsmenn vilja sjá sem sameiningartákn þjóðarinnar og andlit Íslands á alþjóðavettvangi þann mann sem gerði Ísland samábyrgt í stríði sem kostaði hundruð þúsunda lífið.

Alvarleiki Wintris eru hagsmunir SDG við haftalosun

Sigmundur Davíð hefur haldið því fram að Wintris félag konu hans hafi alltaf greitt skatta. Það má vera. Það mál snýst um einhverjar milljónir. Stóramálið er hins vegar að kona Sigmundar hafði sem eigandi Wintris og því kröfuhafi í föllnu bönkunum fjárhagsmuni að gæta í haftalosunarferli eiginmanns síns. Það mál varðar hundruð milljarða. 

Deilt er um hvaða hagsmuni Sigmundur lét víkja við val á leiðum til haftalosunar, hagsmuni landsmana eða fjárhagsmuni konunnar hans. Sjálfur segist hann hafa fórnað hagsmunum konu sinnar. Ekki er þó deilt um að á síðustu stundu í haftalosunarferli ríkisstjórnar Sigmundar þá var skipt um stefnu. Í stað þess að leggja útgönguskatt á alla kröfuhafa þá var kröfuhöfum boðið að greiða stöðugleikaframlag í stað stöðugleikaskatts. Framlag kröfuhafanna varð 384 milljarðar í stað stöðuleikaskatts upp á 620 milljarða, samkvæmt Fjármálaráðuneytinu og Seðlabanka Íslands.

Kona Sigmundar hefur sagt opinberlega að hún sé kröfuhafi og makar hafa alltaf fjárhagslega hagsmuni af fjárhag maka síns þó að um séreign sé að ræða. Það eru alþjóðlega viðurkenndir góðir stjórnhættir að fólk sem velji að fara með almannavald forðist svona hagsmunaárekstra, en sé það ómögulegt að upplýsa þá um þá. Hjónin gátu ekki bæði haldið í sitt, Sigmundur í drauminn um sæti í ríkisstjórn og konan hans í kröfur Wintris, án þess að búa til hagsmunaárekstra sem alþjóðasamfélagið hefur sameinast um að skuli réttilega forðast. Sigmundur ætlaði skiljanlega ekki að sleppa stjórnmálaferlinum, en félög eins og Wintris eða kröfur þeirra er hægt að selja. En þau ákváðu bæði að halda í sitt og hafa hljótt um það.

Stóru hagsmunirnir eru ekki skattskil konu Sigmundar, alvarleiki Wintrismálsins er fyrst og fremst að sem æðsti valdamaður landsins hafði Sigmundur Davíð hagsmuni að gæta beggja vegna borðsins þegar kökunni var skipt milli landsmanna og kröfuhafa við losun hafta og hélt því leyndu fyrir þjóðinni.

Hátt í 400 milljónir í skatta

Hver getur endurreist Framsóknarflokkinn?

Þegar velja á fólk í framlínuna er farsælt vita hvort það beri sömu gildi og þú fyrir brjósti, hvort það sé nógu frambærilegt til að halda þeim á lofti og hve vel því sé treystandi til að vinna þeim brautargengi. Hvað frambjóðandi setur í forgang, hvort hann sé frambærilegur og traustsins verður skiptir kjósendur máli.

Þegar Sigmundur fór fyrst fram í flokknum töluðu Framsóknarmenn um að nýi leiðtoginn væri kominn. Mörgum landsmanna er annt um þau gildi sem Sigmundur Davíð setur í forgang og hann var frambærilegur sem þingmaður í stjórnarandstöðu. Sem forsætisráðherra hefur honum ekki tekist að halda á lofti sínum helstu baráttumálum, og þar sem Sigmundur hefur staðið hvað sterkastur, í baráttunni við kröfuhafa, hefur hann verulega tapað trúverðugleika.

Nú mun Framsóknarfólk spyrja sig hvort Sigmundur Davíð sé enn nógu sterkur í oddinum til að vinna fleiri kosningasigra, eða hvort einhver annar væri sem leiðtogi bæði beittari og minna brothættur.

Það má vera að Sigmundur Davíð nái að spila góða nauðvörn í umræðunni um heimilin, kröfuhafana og afnám hafta, en ólíklegra er að hann geti aftur með trúverðugum hætti verið séður sem skjöldur heimilanna og sverðið í stríðinu við kröfuhafana.

Hvað hefur Sigmundur þá til að koma flokkinum aftur í sterka stöðu? Stríð um nýjan spítala á nýjum stað? Barátta við leyndarhyggju fyrri ríkisstjórnar? Það eru mál sem brenna á mörgum. Óttinn við suma útlendinga hefur líka skilað Framsóknarflokkinum atkvæði. En ekkert af þessu er í samanburði við skuldaniðurfellingu fyrir heimili landsins í stríðinu við hrægamma, eins og fyrir síðustu kosningar.

Ef engin annar stígur fram þá mun Sigmundur eflaust fara áfram með formennsku Framsóknarflokksins. Í besta falli mun hann stunda góða nauðvörn og finna sér nýtt stríð fyrir næstu kosningar. Í versta falli mun hann vera bitur og bitlítill og brotna á slæmum tíma fyrir flokkinn. Í öllu falli er harla ólíklegt að Sigmundur Davíð endurreisi Framsóknarflokkinn.

 

 

Praktísk stjórnmálaþáttaka 101

Vinur minn vildi vita hvernig hann gæti "tekið virkari þátt í pólitík." Hann er á annarri önn í stjórnmálafræði í Háskóla Íslands og vantaði praktísk ráð. Hann bauð mér upp á kaffi og tækifæri til að taka saman það praktískasta sem rekið hefur á mínar fjörur til að ná árangri í stjórnmálastarfi.


Þekktu sjálfan þig.
Til að ná árangri í því sem krefst langtíma vinnu er mikilvægt að þekkja sjálfan sig. Peter Drucker faðir nútímastjórnunar sagði að fólk sem þekkir sín gildi, styrkleika og starfsumhverfi sem það þrífst vel í veit hvort og hvernig það getur unnið verk. Það sóar ekki tíma sínum og orku í það sem skilar ekki hámarks árangri. 

Í 'Managing Oneself' tekur Drucker saman þessa þrjá grundvallar hluti til að vita um sjálfan sig.
Hér er svo samantekt sem ég tók saman á einni blaðsíðu.
Hér að lokum er svo besta verkfæri sem ég hef rekist á til að finna þessa þrjá þætti um sjálfan sig.

Þekktu "leikinn" og leikmennina.
Leikir eins og skák skapa ramma, hugtök og vettvang til að skilja og þjálfa hugsun sem skilar árangri í hernaði, já og pólitík. Rétt eins og lobbýistar hafa atvinnu af því að hafa áhrif á þá sem fara með pólitískt vald, þá má skilgreina stjórnmálamenn sem þá sem hafa atvinnu af því að koma sér í stöðu sem fer með pólitískt vald. Það skiptir því stjórnmálamenn sköpum, þegar nær dregur kosningu eða skipan í valdastöður, að vera álitinn ákjósanlegasti kosturinn hjá þeim sem ráða hver situr hvar. Slíkt álit má kalla pólitískt kapítal. Til að áætla og hafa áhrif á það hvernig stjórnmálamaður beitir áhrifum sínum og völdum þá er nauðsynlegt að sjá hvað veldur honum álitshnekki og kostar hann því pólitískt kapítal, og hvernig hann getur vaxið í áliti og orðið sér þannig úti um meira af því.

Nánari útskýring á praktískri nálgun á skiptimynd stjórnmálamannsins, pólitískt kapítal, má lesa í grein sem ég tók saman um þingstarfið.
Dýpri greining á stjórnmála"leiknum" er hægt að lesa um í bók sem ég skrifaði 2008, The Game of Politics - A Game Manual, sem öllum er frjálst að hala niður og deila án endurgjalds.

Byggðu á árangri.
Ekkert er eins árangursríkt og árangur - 'Nothing succedes like success'. Drucker benti á að einblína á það sem þú getur gert sem skilar hámarks árangri. Sér í lagi ef það er eitthvað sem engin getur gert jafn vel. 

Stjórnmálaflokkar eru knúnir áfram af sjálfboðaliðum. Sér í lagi flokkar sem hafa ekki verði í aðstöðu til að skipa sitt fólk í launaðar stöður hjá hinu opinbera. Biblían um árangur við skipulag í sjálfboðaliðastarfi er Managing the Non-Profit Organization eftir Drucker.

Við forgangsröðun í heilbrigðismál er öryggi lágmarkskrafa

Grein Sigmundar Davíðs forsætisráðherra í Fréttablaðinu í dag er skólabókardæmi um hvernig skal blekkja með hálf-sannleika.

Það er satt sem SDG segir að: "Framlög til spítalans hafa aldrei verið meiri og það sama á við um heilbrigðiskerfið."

Ef krónurnar eru taldar, Já. Ef hrun krónunnar er talið með, þá Kannski lítillega.

En á meðan að framlögin hafa í raun hækkað lítið sem ekkert þá hefur þörfin aukist verulega með auknum meðalaldri þjóðarinnar og uppsöfnuðum vandamála vegna fjársveltis hrunáranna. Þetta vita SDG og stjórnarliðar.

En það segir ekki einu sinni alla söguna.

Framlög stjórnvalda í dag miðað við þörfina tryggja ekki öryggi sjúklinga. Og það hlýtur að vera lágmarkskrafa við forgangsröðun skatttekna og úthlutunar þeirra, að tryggja öryggi sjúklinga. Annars eru menn klárlega ekki að forgangsraða í heilbrigðismál eins og 90% landsmanna vilja.

Stjórnarflokkarnir hafa sýnt það aftur og aftur að þeir forgangsraða öðru á undan raunverulegri fjárþörf heilbrigðiskerfisins:
- Lægri veiðigjöld fyrir sjávarútvegsfyrirtækin hefur meiri forgang.
- Það hafði afnám auðlegðarskattsins líka.
- Lækkun skatta á álfyrirtækin var forgangsverkefni fjármálaráðherra 1. maí.
- Svo vildi hann forgangsraða því svigrúmi sem lægra vaxtabyrði ríkissjóðs skapar til þess að lækka skatta.
- 3 milljarða vantaði til að veita nauðsynlega heilbrigðisþjónustu, skv öllum forsvarsmönnum heilbrigðiskerfisins, en fjárlögin voru höfð hallalaus um 3,4 milljarða.

Örugg fyrsta flokks heilbrigðisþjónusta er ekki í forgangi hjá þessari ríkisstjórn.

Sigmundur Davíð: Toppari þráir athygli

Stjórnarflokkarnir hættulegir heilsu og lífi landsmanna

Það er afgerandi vilji landsmanna að forgangsraða sínu skattfé í heilbrigðiskerfið eins og fram kemur í könnun sem Capacent Gallup gerði fyrir þingflokk Pírata fyrir ári og núna aftur í haust. Þetta á við alla aldursflokka, alla tekjuflokka, kjósendur allra flokka og úr öllum kjördæmum, konur og karla. Meira en 90% landsmanna setja heilbrigðiskerfið í forgang á fjárlögum.

Heilbrigðiskerfið á Íslandi er veikburða eftir áralangt fjársvelti. En þrátt fyrir mikinn niðurskurð, lág laun, lélegan aðbúnað og mikið vaktaálag í gegnum kreppuna þá hefur heilbrigðistarfsfólkið okkar haldið öllum þáttum heilbrigðisþjónustunnar grænum samkvæmt alþjóðlegum þjónustustuðlinum „Euro Health Consumer Index 2014“ sem landlæknir styðst við samkvæmt lögum og reglum. Ákvörðun stjórnvalda að forgangsraða ekki nægu skattfé í að hækka laun heilbrigðisstarfsmanna til að koma í veg fyrir fyrsta læknaverkfall Íslandssögunnar og önnur verkföll heilbrigðisstarfsmanna hefur sett landsmenn í hættu.

Landlæknir sendi stjórnvöldum þrjú formleg bréf í vor um að „ástandið í heilbrigðiskerfinu sé komið út fyrir þau mörk að hægt sé að tryggja öryggi sjúklinga“ og „aðgerðir sem binda enda á verkfall án þess að samningar náist leysa ekki vanda heilbrigðiskerfisins þegar til lengri tíma er litið“. Ríkisstjórnin batt samt endi á verkfallið með lögum í stað samninga.

Þetta er hættuleg staða fyrir heilsu og líf landsmanna sem hægt er að forðast ef stjórnarmeirihlutinn hlustar á forgangsröðun yfirstjórna heilbrigðiskerfisins og forgangsröðun landsmanna á eigið skattfé. Meðan ekki er vilji fyrir því hjá stjórnarflokkunum þá eru þeir í orðsins fyllstu merkingu hættulegir heilsu og lífi landsmanna.

Fjársveltið þjóðinni til skammar