Leikjafræði gengistryggðu lánanna.

Meðan HM er í hámarki er stórleikur í gangi á Íslandi. Það færðist fjör í leikinn á dögunum þegar Hæstiréttur gaf gengistryggingu lána rauða spjaldið. En hvaða leikmenn eru í keppnisliðunum og hver er staðan í leiknum?

Stöðuleiki fjármálakerfisins vs. Réttaröryggið.

Staðan er þannig að meðan réttaróvissa ríkir um hverjir vextir lánanna skulu vera segja 36. grein laga nr. 7/1936 og neytendaverndartilskipun Evrópusambandsins 93/13/EBE að neytandinn skuli njóta vafans. Í þessu tilfelli eru neytendurnir í liði lántakenda.

Lið fjármálafyrirtækja eiga að hámarka arð fjárfesta sinna. Þau klúðruðu sókn með ólöglegum lánum og reyna nú að bjarga því sem bjargað verður fyrir sig og sína liðseigendur. Fyrrum liðsmaður þeirra, Gylfi Magnússon Efnahags- og viðskiptaráðherra, keppist nú við að sannfæra almenning um að það sé almannahagur að verja fjárfesta í leiknum.

Lið Seðlabanka og fjármálaeftirlitsins (FME) eiga að standa vörð um stöðuleika fjármálakerfisins. Þeir hafa líka stillt sér í vörn fjárfesta og segja það almannahagsmunir að allir geri slíkt hið sama. Vörnin er samt veik því allur efnahagsleikvöllurinn hvílir umfram allt á réttaröryggi. Þegar réttaröryggið tapast þá tapast stöðuleiki fjármálakerfisins einnig.

Ragna Árnadóttir ber sem dómsmálaráðherra ábyrgð á að lögum sé framfylgt og að standa vörð um réttaröryggi landsmanna. Við umbjóðendur hennar höfum veitt henni viðtækt vald til þessa. Til að verja réttaröryggi landsins í leiknum þarf leikáætlun Rögnu að minnsta kosti að innihalda þrjár eftirfarandi leikfléttur.

 

Leikáætlunin: "Réttaröryggi."

1. Þegar Seðlabankinn og FME mæla með því að fjármálafyrirtæki rukki vexti sem réttaróvissa er um og brjóti því lög um að neytandinn skuli njóta vafans, þá á dómsmálaráðherra að gefa út yfirlýsingu að slíkt verði ekki liðið.

2. Ef lánafyrirtækin senda út innheimtuseðla með vöxtum sem réttaróvissa er um þá er það ekki neytandans að fara í mál. Það er dómsmálaráðherra að framfylgja lögum um að neytandinn skuli njóta vafans og benda fjármálafyrirtækjum á að þau geti sótt rétt sinn fyrir dómsstólum. En ef þau haldi vaxtakröfunni til streitu verði þau ákærð.

3. Ef sýslumenn, og aðrir starfsmenn undir dómsmálaráðherra, ætla að ganga erinda fjármálafyrirtækja við að ganga að eigum lántakenda án þess að sækja málið fyrir dómsstólum, skal dómsmálaráðherra samstundis stöðva þá og ávíta.

Boltinn er hjá Rögnu. Sjáum hvort hún og hennar liðsmenn standa vörð um réttaröryggi landsmanna eða hvort hún stendur á hliðarlínunni meðan hennar sýslumenn og lögregla hjálpa fjármálafyrirtækjunum að rúlla upp réttaröryggi landsins.

Miða við lægstu vexti á hverjum tíma

Athugasemdir

[sigkja (IP-tala skráð) 30.6.2010 kl. 17:50]

Smá pæling: Hver seldi gallaða vöru, hver fékk greitt í topp fyrir skuldabréf sem nú er komið í ljós að var ólöglegt? Hver er kaupandi og hver er seljandi? Hver fékk peninga og hver fékk pappír? Hver er sekur um að hafa selt ólöglegt skuldabréf? Ef ég býðst til að kaupa ólöglega vöru er ég þá eitthvað sekari en seljandinn? Ef ég skrifa undir pappír og sel þér pappírinn, þú færð pappír með loforðum og ég fæ peningana á borðið, er ég þá neitandinn í þeim viðskiptum?

Hvernig var þetta með naflaskoðunina?

[Jón Þór Ólafsson, 30.6.2010 kl. 23:37]

Það þarf klárlega að rannsaka þessi ólöglegu lán.

[Guðmundur Ásgeirsson, 1.7.2010 kl. 13:51]

Sæll Jón Þór og takk fyrir góðan pistil.

"Það þarf klárlega að rannsaka þessi ólöglegu lán."     Working on it...

Ég vil bæta því við að lögreglunni ber í raun skylda til að bregðast við nú þegar og hefja rannsókn. Seðlabankinn og FME hafa nefninlega að öllum líkindum sjálf gerst sek um brot á almennum hegningarlögum með því að hvetja aðra til lögbrota. Slík hvatning er refsivert athæfi sem varðar allt að 6 ára fangelsisvist!

Við virðumst því miður búa í bananalýðveldi.     =